बाँके, १५ वैशाखः नेपलगञ्ज विमानस्थलमा आजदेखि यात्रुहरूका लागि निःशुल्क बस सेवा सञ्चालनमा ल्याइएको छ । यात्रुहरूको सेवा, सुविधा र सहज आवागमनलाई मध्यनजर गर्दै नागरिक उड्डयन प्राधिकरणद्वारा उक्त सेवा सञ्चालनमा ल्याइएको हो ।

विमानस्थलबाट राँझा चोकसम्म करिब २ किलोमिटर दूरीमा यात्रुहरूलाई सहज रूपमा आवतजावत गर्न सकून् भन्ने उद्देश्यले  बस सेवा सञ्चालन गरिएको नेपालगञ्ज विमानस्थल कार्यालयले जनाएको छ । विशेषगरी वृद्धवृद्धा, बालबालिका, अपाङ्गता भएका व्यक्ति तथा धेरै सामान बोकेर यात्रा गर्ने यात्रुहरूलाई लक्षित गर्दै यो सेवा सुरु गरिएको बताइएको छ ।

उक्त बसमा बस्नु भएकी यात्रु सरिता शर्माले निःशुल्क ट्रली बस सेवाले विशेष राहत मिलेको बताउनुभयो । “म आज काठमाडौँबाट नेपालगञ्ज आएकी हुँ । यहाँ झर्दा अटोले लिने चर्को शुल्क र अटवालासँग बार्गेनिङ गर्दा खेप्नुपर्ने गर्मी यी दुवैबाट छुटकारा पाएको अनुभूति भएको छ ।ू उहाँले भन्नुभयो, ूगर्मीको समयमा धेरै सामान बोकेर विमानस्थलदेखि बाहिरसम्म हिँड्न निकै गाह्रो हुन्थ्यो । अहिले ट्रली बस सेवा सुरु भएपछि निकै सहज भएको छ । विशेषगरी महिला, वृद्धवृद्धा र बालबालिकासहित यात्रा गर्नेहरूका लागि यो सेवा धेरै उपयोगी छ ।”

त्यस्तै, सोही बसमा सवार यात्रु रमेश यादवले पनि यो सेवा यात्रुमैत्री भएको प्रतिक्रिया दिनुभयो । उहाँ पनि सरितासँगै एउटै विमानमा नेपालगञ्ज विमानस्थलमा काठमाडौँबाट आइपुग्नुभएको हो । “विमानस्थलमा छोटो दूरी भए पनि घाम र गर्मीका कारण हिँड्न समस्या हुन्थ्यो । आफ्नो सवारी साधन नहुँदा अटोवालाहरूसँग चर्को भाडामा यात्रा गर्नु पर्थ्यो । तर निःशुल्क बस सेवाले समय पनि बचाएको छ र यात्रुहरूलाई सुरक्षित रूपमा गन्तव्यसम्म पुग्न सहज बनाएको छ । यस्तो सेवा निरन्तर रहनुपर्छ ।” उहाँले भन्नुभयो ।नेपालगञ्ज विमानस्थल प्रमुख सन्तोष कुमार पोखरेलले यात्रुहरूको सुविधालाई प्राथमिकतामा राखेर सेवा विस्तार गरिएको बताउँदै भन्नुभयो, “विमानस्थलमा आउने तथा यहाँबाट बाहिरिने यात्रुहरूले छोटो दूरीमा पनि सहज र सुरक्षित रूपमा यात्रा गर्न सकून् भन्ने उद्देश्यले निःशुल्क बस सेवा सुरु गरिएको हो । यसले यात्रुहरूको समय बचत गर्नुका साथै उनीहरूलाई थप सहजता प्रदान गर्नेछ ।”

उहाँले थप भन्नुभयो, “झण्डै २५ जना यात्रु अट्ने सिट क्षमता रहेको यो बस पूर्ण रूपमा अपाङ्गमैत्री छ । शारीरिक रूपमा असहजता भएका यात्रुहरूलाई समेत सहज पहुँच होस् भन्ने सोचका साथ यसको सञ्चालन गरिएको हो । आगामी दिनमा यात्रुहरूको आवश्यकताअनुसार यस्ता सेवा अझ विस्तार गर्दै लैजाने योजना पनि रहेको छ ।”

नागरिक उड्डयन प्राधिकरणका अनुसार विमानस्थलको सेवा प्रवाहलाई थप व्यवस्थित, आधुनिक र यात्रुमैत्री बनाउन विभिन्न सुधारका कामहरू अगाडि बढाइँदै छन् । निःशुल्क बस सेवा पनि सोही योजनाअन्तर्गत सञ्चालनमा ल्याइएको हो । स्थानीयवासी तथा यात्रुहरूले यस सेवाबाट विशेष राहत महसुस हुने बताएका छन् । विशेषगरी गर्मीको समयमा छोटो दूरी हिँड्नुपर्ने बाध्यता हट्नुका साथै सहज र सुरक्षित रूपमा गन्तव्यसम्म पुग्न सकिने भएकाले यात्रुहरू खुसी देखिएका छन् ।