रुपनी जि.एम
बर्दिया । बर्दिया भन्ने बित्तिकै राष्ट्रिय निकुञ्ज र निकुञ्ज भित्र रहेका जनावरहरुको सम्झना आउँछ । बर्दियाको ठाकुरद्धारा भन्ने ठाउँ होमस्टे र पर्यटन प्रर्वद्धनकालागी निकै चर्चित र आफ्नो एउटा बेग्लै पहिचान बनाउन सफल ठाउँ हो । पर्यटन प्रर्वद्धनका विषयमा यस्ले लुम्बिनी प्रदेशकै ध्यान तानेको छ । साथै अन्यत्रबाट पनि त्यस ठाउँमा पर्यटकहरु जाने गर्दछन् र जंगल सफारीमा भेटिएका जनावर देखेपछि मोहीत भएर फर्कने पनि गर्दछन् । विशेषगरी बर्दियाको राष्ट्रिय निकुञ्जमा वन्य जन्तु र जनावर हेर्नकै लागी पर्यटकहरु भित्रने गर्दछन् ।
निकुञ्ज घुम्न गएका पर्यटकहरुको ध्यान अन्य वन्य जन्तुको तुलनामा निकुञ्जमा रहेका चित्तलहरुको रोमाञ्चक गतिविधिले तान्ने गरेको छ । निकुञ्ज पसेको केही समय बितेपछि परैबाट देखिने हरियो घाँसे मैदान र त्यही मैदानमा आ–आफ्नो झुण्डमा चरि रहेका चित्तलका बथानले नै हो पर्यटकलाई मनमोहक बनाउने । चित्तल देखेपछि पर्यटकहरुको रमाहट र चिच्चाहटको आवाजले तर्सिंदै कान ठाडो पारेर, बुर्कुसि मार्दै घाँसे मैदान छाडेर जंगल भित्र पस्दै गर्दाको दृश्यले पर्यटकको मनमा एउटा बेग्लै आनन्द उत्पन्न गराउँदछ ।टेलिभिजनका पर्दामा नेश्लन जियोग्राफि च्यान भित्र देखिने ‘वाईल्ड एनिमलस’ को जस्तै दृश्य भन्दा कमको देखिदैन बर्दियाको राष्ट्रि निकुञ्जमा जनावरहरुको चहलपहल । उक्त निकुञ्ज भित्र रहेको घाँसे मैदानमा विशेष गरी चित्तलको असाध्य नै मनमोहक दृश्य देखेर पर्यकटहरु लोभिने गर्दछन् । कोही सिंघ भएका बाह्र सिंगे त कोही नभएका मुडुले चित्तलको बथान उत्तिकै देख्न पाईन्छ निकुञ्जमा । निकुञ्ज भित्र जंगल सफारी गरिसकेपछि निकै राम्रोसंग वन्य जन्तुको संरक्षण गरेको भन्दै वन्य जन्तुलाई नजिकैबाट हेर्न पाएकोमा पर्यटकहरुले खुशी ब्यक्त गर्ने गरेको बताउँछन् निकुञ्जका प्रमुख संरक्षण अधिकृत विष्णु प्रसाद श्रेष्ठ ।दुर्लभ वन्यजन्तुहरु अवलोकन गर्न आउने क्रम बढेसँगै बर्दियामा वन्यजन्तु पर्यटन फस्टाउन थालेको अधिकृत श्रेष्ठको भनाई छ । उनका अनुसार उक्त निकुञ्जमा बाघ, पाटेबाघ, अर्ना, जरायो, चित्तल, लगुना, रतुवा लताएत विभिन्न प्रजातिका चराचुरुंगीहरु पाईन्छन् । निकुञ्ज भित्र सफारीमा गएका पर्यकहरुले बाघलाई सित्तिमित्ति देख्न नपाएपनि अन्य जनावरलाई भने हेरेरै आनन्दित हुने गर्दछन् । त्यसमा पनि आन्तरीक र बाह्य दुबै पर्यटकहरुको मुख्य उद्येश्य भनेकै होमस्टे गर्ने र राष्ट्रिय निकुञ्ज भित्र रहेका जनावरहरुको रोमाञ्चक गतिविधि नियाल्ने नै हो ।