बाँके, कोहलपुर । स्वास्थ्य निर्देशनालय लुम्बिनी प्रदेशका स्वास्थ्य सेवा निर्देशक भरत बहादुर कुँवरले मिडियाकर्मी मार्फत उपलब्ध स्वास्थ्य सेवाबारे आम नागरिकलाई सत्य तथ्य सूचना सम्प्रेषण गर्न आग्रह गरेका छन् । स्वास्थ निर्देशनालय लुम्बिनी प्रदेशको आयोजना शुक्रबार कोहलपुरमा आयोजित मिडियाकर्मी र स्वास्थकर्मिहरुका लागि स्वास्थ प्रवर्द्धन सेवा सम्बन्धि पैरवी कार्यक्रममा उनले यस्तो आग्रह गरेका छन् ।

निर्देशक कुँवरले डक्टरको भन्दा पनि पत्रकारले लेखेका कुरामा आम जनताले झट्ट बिश्वास गर्ने भएको हुनाले समाचार सम्प्रेषण गर्दा पत्रकार र मिडिया हाउस निकै नै सजक हुन आवश्यक रहेको औंल्याएका थिए । उनले सर्वसाधारण माझ भ्रमित हुने र स्वास्थ सङ्ग प्रत्यक्ष जोडिएको कुरा हावादारी भरमा नलेखी सही सत्यतथ्य कुरा सर्वसाधारण माझ पुर्याउन सञ्चारकर्मीलाई आग्रह समेत गरेका थिए ।

कार्यक्रममा कोहलपुर नगर स्वास्थ्य शाखा प्रमुख अनिल सेन ठकुरीले कार्यक्रमको उद्येश्यका बारेमा जानकारी दिदैं हालसम्म स्वास्थ्य शाखामार्फत भए गरेका कामहरुको बारेमा जानकारी गराएका थिए । उनले कोहलपुरमा रहेका स्वास्थ्य संस्थाहरुको संख्या र अवस्था, खोप, पोषण, सुरक्षित मातृत्व कार्यक्रम, परिवार नियोजन कार्यक्रम, दादुरा–रुबेलाको वर्तमान अवस्था लगायतका बारेमा गरिएको चेकजाँच, विद्यार्थी लक्षित दादुरा–रुवेला खोप, औषधी व्यवस्थापन लगायतका कामहरु शाखा मार्फत भैरहेको बताए ।

कोहलपुर नगरपालिका स्वास्थ शाखाबाट भएका स्वास्थ सम्बन्धिका सेवा र सचेतनाका कार्यक्रम बारे नगर स्वास्थ प्रमुख अनिल सेन ठकुरिले प्रष्ट पारेका थिए। मिडियाकर्मी र स्वास्थकर्मिहरु बिचको सम्बन्धलाई नजिक ल्याउन जरुरी रहेको भन्दै २०७४ पछि २०७९ मा दोस्रो पटक मिडियाकर्मी र स्वस्थ्यकर्मीलाई संगै राखेर कार्यक्रम गरिएको उनले बताएका छन् ।कोहलपुर नगरपालिकाका कार्यपालिका सदस्य एवम् सामाजिक बिकास संयोजक इस्वरी प्रसाद बिकले सञ्चारकर्मीले नगर भित्र भएका अन्य गतिविधि सङ्गै स्वास्थ क्षेत्रको गतिविधिहरु जस्ताको त्यस्तै आम समुदाय माझ पुर्याइदिनु पर्ने र मिडियकर्मी र स्वास्थकर्मिको सम्बन्ध नङ र मासु जस्तै रहनुपर्ने बताएका छन् । सहभागी सबैको राम्रो नराम्रो गुनासा सुनिसकेपछी उनले कार्यपालिकाको बैठक बसि सबै समस्याको समाधान गर्ने जानकारी समेत गराएका छन् ।

उनले मानव जिवनमा स्वास्थ्य पहिलो प्राथमिकतामा पर्ने भएकाले सबै सरोकारवाला निकाय संवेदनशील हुनुपर्ने बताएका छन् । कार्यक्रममा सहभागि पत्रकारहरुले नगर स्वास्थ्यले पत्रकारिता क्षेत्रलाई समेट्न नसकेको गुनासो गरेका थिए । कोहलपुरमा आवश्यकता अनुसारको जनशक्ति कम हुनु, दरबन्दी अनुसारका स्वास्थ्यकर्मी र कर्मचारी अभाव, उपकरणको अभाव, औषधिको अभाव, आयुर्वेदिक औषधालयका समस्या तथा एम्बुलेन्स समस्या लगायतका कुरा स्वास्थ्य क्षेत्रले भोगीरहेको बारेमा जिज्ञासा राखेका थिए ।

सञ्चारकर्मीहरुले स्वास्थ्य शाखा र संचारमाध्यमको सम्बन्ध समधुर हुनुपर्नेमा जोड दिदै कोहलपुर नगर स्वास्थ्य शाखा संचार मैत्री हुन सुझाव समेत दिएका छन् । यस्तै कार्यक्रममा कोहलपुर नगरपालिकाका स्वास्थ्य शाखाका स्वास्थ्यकर्मीहरुले जस्तो सुकै अप्ठ्यारोहरुमा पनि आफूले सेवाग्राहीलाई गुणस्तरीय सेवा दिईरहेको बताए ।